Job 39

1 “Jop, odao. Nago koneaniwe?
Te bulu dulude bidibo meme kibugo wai ame
nabo sogo nago koneai dawe?
Tama me nago te hasa dia dabego wai
ame nabo nago subo dawe?
2 Tama nisu naga polua
te meme kibu dali, te dia hasa dali sigo
wai augwa idago haligade bidibo, te nago
koneaniwe?
Tama nago koneani bogo, nisu te hasa ida dabego
bogoli si sugunama, wai saibawe?
4 Tama te wai dabe augwa ida dabe dali
buside me kala silide bidaibao.
Tama augwali genuai elama, bomo ebo dao.
Tama augwali genuai polo ela sabo si da,
teda augwa ida taga peyu, mu tama pabo dao.
Tama augwali ma asobo menio,” wali.

5 “Dego mu te bulu donki dabe bono pįsįgina palobaso,
busiba subigila pomainu yai dawe?
6 Eno augwalibolo wa pai bulu, me doloba pai bulu,
tama tamu elalubo bulu mawai dao.
Tama augwa bulude bidibo ąǫ yaibao.
7 Te bulu donki dabe augwaligo koneani.
Augwali hanude bidibaso da,
teda bidi dabego augwali bono gebelama,
tama augwaligo sę emainu hąe weyu yaibao.
Tama tibaso, augwaligo te hanude wabo po dabe
me kilikili wabo odogobeo.
Te tudi ola mawaibao.
8 Tama augwali te bulu dude biliyu,
augwa tuabo nai te nosai dabe,
ni yabe dabe tama gege biliyu, bilaibao,” wali.

9 “Jop, nage de dawe?
Te bulu kau kibu omaigo nago sę yaibawe?
Tama hulide nago kau kibugo beba piagasaibawe?
10 Nago aga haliga gebelama,
tama agai nago gi tǫ elebo masin
kegasa bilimainu yaibawe? Tega?
11 Nago koneani, agai bomo genuai mu elalubo.
Tama tibaso, nago homugo agai nage tau selama,
nago genuai sę yaiba eyuwe?
12 Tama nago homugo agai nago wit nai giba pelama,
tama te wit nai inayali sela aselama,
te wit nai yabe dali, bo dali sela sąyao po waibawe?
13 Te tǫli tiwai genuai ba ^{▼▼39:13Te Jop bidali bulude bidibo hasa kebi tiwai bago ebo kolesaga te tedali gasagi yai, te dago bulude bidibo hasa kebi kolesaga tiwai si page me elalubeo.} dabe
dwagi yai homu ebo sogo da,
te augwa bogo memenege ebo dao.
Tiali goli, augwaligo te bobobage
dogoni bago ebo gilama,
augwali augwa wai dabe dali
dwagi yai sę ilibo menio.
14 Te tǫli tiwai genuai ba dabe
augwa ge tǫde mubo dao, tama tagalobo dao.
Tama tǫ posologo te ge posolo ilimainu ebo dao.
15 Augwaligo augwa ge godolo me ebo menio.
Tiyu, bidigo me, bulu hasago me
te ge dabe agawaibao homu egobeo.
16 Te tǫli tiwai ba dabe augwa wai
ma gasa bago wai tonobo ąǫ ebo dao.
Tama augwaligo augwalide dwagi yai
kolesaga me ebo menio.
Augwa gǫų dolobaso, augwa ge odolali saganai dao
homu me ebo menio.
Augwa ge subigila sąsągano bilibo sę sabilibo dao.
17 Augwaligo tama tibo da. Magi baso meni.
Eno augwali dwagi yai kolesaga me mawai menio.
18 Tiali goli, te tǫli tiwai ba dabe hodaluama,
pabo si da, augwali bomonama mu udabo dao.
Tama augwaligo bogo memenege genuai mu ebo dao.
Tama udada peyu, augwaligo kibu hosde
dualasa pabo bidi dabe geanobo dao,” wali.

19 “Jop, nago magi sę ebo usugowe?
Nago te hos dabe bomo mabo dawe? ^{▼▼39:19Te ves 19-25 tede te ami bidi dabego te dualasa peyu, te boi hwįgi pabo kibu nogi hos dabede wali po page te vesde elalubo suao.}
Tama nago agai bobobage pedu nisi muai dawe?
20 Naga homugo te hos digibulu samanobo
te mano yali gilama emainu naga digi nigilai dawe?

Tega? Te hos dabego ga wabo bomonama mu
wabo dao.
Tama augwaligo ga wabogo we bidi dabe wi ilibo dao.
21 Te hos dabe augwaligo genuai bomo
elalubode augwali pemene elama,
augwali sasamano peyu,
te augwa nogo sągą pidibu waibao.
Tama augwali hwį yainogo bomonama mu udabo dao.
22 Te hos dabe augwali magi naide me
wi elama, noma sabo menio.
Te wąbi hwįbo genuai u badi me augwali
wi me soabo menio, te wąbi hwįbode.
23 Augwaligo te ami bidi augwali tigide
dulalumainu ebo dao.
Tama augwali udabo sogo da,
te hwįbo bidi dabego ene beledi kidagalo wabo dao.
Tama te ami bidigo sesemone ene poa pali da,
te giligade ula ebo dao.
24 Te hos dabego bu wabo odobo si da,
augwali dua me bidibo menio. Mu meni.
Augwaligo haliga tigi hodaluama,
tama hwįgi pabo homu naga ebo dao.
Tama augwali bomonama mu udabo dao.
25 Tama augwaligo bu wabo
odobo si da, augwaligo ga wabo dao.
Augwali te wąbi hwįbo digibulu elalubadi digi,
augwaligo denami bolo odobo dao, te wąbi hwįbo
denami.
Tama augwaligo te ami ofisago i hae,
te aga ami bidibolo wabo pode
moni wąbi hwįmainu hae wabo po odobo dao,” wali.

26 “Jop, eno homugo nago
te ba kemodagego ebo kolesagaba
homu kolesaga muani bogo,
tama augwali te dolo nogo badu poloba
bola pabo dawe?
27 Teda nago digi te po wabode te ba bunutogobo dabe
augwaligo be te bulu duba sę igi pabo dawe? Tega?
28 Augwali te bulu duba bidigi pelama,
tama augwaligo be te masigi dabe yai madi,
me bulu dwai madi augwaligo be sę igi pabo dao.
Te tobage bulu da, augwaligo dwagi yai
dualalubo bulu tiwai dao.
29 Augwali augwa bede dulaluyu,
te hasa dabe gedu gegebo dao.
Tama hasa digibulu bidibo me tagala,
augwaligo subo dao.
30 Te bunutogobo gamigo gǫųgo
te bulu hasago kaneme tubo godolo mu ebo dao.
Tama wąbi hwįnama, bidi me isai tigi pulu tede
munalubaso da, te kemodage sibi teba
sisinagasabo dao,”
God Genuai Bidigo te po Jopbolo wali.